ബം​ഗ​ളൂ​രു: ഉള്ളടക്കം പി​ൻ​വ​ലി​ക്കാ​ത്ത അക്കൗണ്ടുകൾ ബ്ലോക്ക് ചെയ്യാനുള്ള കേന്ദ്ര സർക്കാരിന്റെ ഉത്തരവിന്‍റെ നിയമസാധുത ചോദ്യം ചെയ്ത് ട്വിറ്റർ സമർപ്പിച്ച ഹർജിയിൽ കർണാടക ഹൈക്കോടതി കേന്ദ്ര സർക്കാരിന് നോട്ടിസ് അയച്ചു. ആക്ഷേപകരമായ പരാമർശങ്ങൾ അടങ്ങിയ ഉള്ളടക്കം പി​ൻ​വ​ലി​ക്കാ​ത്ത 1474 അക്കൗണ്ടുകൾ ബ്ലോക്ക് ചെയ്യുകയും 175 ട്വീറ്റുകൾ നീക്കം ചെയ്യുകയും വേണമെന്നാണ് ഐ​ടി മ​​ന്ത്രാ​ല​യം ട്വി​റ്റ​റി​നോ​ട്​ ഉ​ത്ത​ര​വി​ട്ടിരുന്നത്. ഐടി ചട്ടപ്രകാരം കഴിഞ്ഞ ജൂൺ നാലിനകം ഇത് പൂർത്തിയാക്കണം. ഇതിനെതിരെ ജൂലൈ 5 ന് ട്വിറ്റർ ഹൈക്കോടതിയിൽ ഹർജി നൽകിയിരുന്നു. മുതിർന്ന അഭിഭാഷകൻ മുകുൾ രോഹതഗിയാണ് ട്വിറ്ററിന് വേണ്ടി ഹാജരാകുന്നത്.

മുദ്രവച്ച കവറിൽ കേന്ദ്ര ഉത്തരവ് കോടതിയിൽ സ​മ​ർ​പ്പി​ക്കാ​ൻ ജ​സ്റ്റി​സ്​ കൃ​ഷ്ണ എ​സ് ദീ​ക്ഷി​ത്​ ട്വി​റ്റ​റി​നോ​ട്​ ആ​വ​ശ്യ​പ്പെ​ട്ടു. ഈ രേഖകൾ കേന്ദ്രസർക്കാരിന്റെ അഭിഭാഷകൻ കൈമാറാനും നിർദ്ദേശിച്ചിട്ടുണ്ട്. ഐടി മന്ത്രാലയത്തിന്‍റെ ഉത്തരവിലെ അക്കൗണ്ടുകൾ ബ്ലോക്ക് ചെയ്യാൻ ഒരു കാരണവുമില്ലെന്ന് ട്വിറ്റർ അറിയിച്ചു. ആക്ഷേപകരമായ കാര്യങ്ങൾ ഉണ്ടെന്ന് അക്കൗണ്ട് ഉടമകളെയും അറിയിച്ചില്ല.

ബ്ലോക്ക്‌ ചെയ്താൽ , അതിന്‍റെ കാരണം ഉടമകളെ ബോധ്യപ്പെടുത്തേണ്ടതുണ്ട്. അക്കൗണ്ടുകൾ ബ്ലോക്ക് ചെയ്യുന്നത് തുടരുകയാണെങ്കിൽ ബിസിനസ്സ് അടച്ചുപൂട്ടേണ്ടി വരുമെന്നും ട്വിറ്റർ ചൂണ്ടിക്കാട്ടി. കേസ് ഓഗസ്റ്റ് 25ന് വീണ്ടും പരിഗണിക്കും.